Në një deklaratë, Kasapoğlu tha se shtetasit janë në izolim nëpër konviktet e 76 provincave të Turqisë.
Ndërkohë, 67.547 qytetarë deri më tani janë liruar nga karantina pas përfundimit të periudhës së detyrueshme 14-ditore, shtoi ai.
“Me udhëzimet e presidentit tonë (Recep Tayyip Erdoğan), ne po presim mysafirët tanë nga të gjitha anët e botës në konviktet tona”, tha Kasapoğlu.
Sipas tij, gjatë 24 orëve të fundit të paktën 422 qytetarë turq janë vendosur në konvikte dhe do të përfundojnë karantinën e detyrueshme 14-ditore.
Ministri tha gjithashtu se libra, lodra dhe pajisje sportive u janë shpërndarë atyre që janë në karantinë për të parandaluar çdo efekt të mundshëm psikologjik.
Turqia dje regjistroi 112.895 të shëruar nga virusi ndërsa numri i vdekjeve arrin në 4.199 dhe numri i rasteve në 151.615.
Që nga e hëna e kaluar vendi ka filluar të shkojë drejt normalizimit me hapjen e disa bizneseve, përfshirë qendrat tregtare.
Pasi për herë të parë u shfaq dhjetorin e kaluar në Wuhan të Kinës, COVID-19 është përhapur në mbarë botën, ndërsa Organizata Botërore e Shëndetësi (OBSH) shpërthimin e ka shpallur pandemi globale.
Sipas të dhënave nga Universiteti “Johns Hopkins” me qendër në SHBA, numri i rasteve të zbuluara me COVID-19 ka kaluar shifrën 4.9 milionë, me mbi 1.7 milionë të shëruar dhe mbi 323 mijë të vdekur.
