Një tërmet i fuqishëm goditi sot në mëngjes bregdetin e rajonit të Kalabrisë në Itali, i cili u ndje deri në Napoli.
Epiqendra e tërmetit ishte në Detin Tirren pranë qytetit të Kozencës, rreth 240 kilometra në juglindje të Napolit.
Instituti Kombëtar për Gjeofizikën dhe Vullkanologjinë, raportoi një tërmet të fortë me magnitudë 6,1 ballë të shkallës Rihter – në një thellësi prej 250 kilometrash, ndërsa Shërbimi Gjeologjik i Shteteve të Bashkuara të Amerikës (USGS) tha se magnituda ishte 6,2 ballë Rihter.
Gjithashtu, tërmeti u ndje në të gjithë Kalabrinë dhe deri në zonën e Vezuvit pranë Napolit në veri dhe rajonin e Bazilikatës në lindje.
Agjencia tha se fillimisht nuk kishte raportime për dëme, por po kryheshin verifikime.
