Kongresmenët Keith Self, Ritchie Torres dhe Mike Lawler, paraqitën një rezolutë të Dhomës së Përfaqësuesve që shprehte mbështetje të fortë për integrimin e Kosovës në NATO.
Rezoluta pohon se qeverisja demokratike e Kosovës, mbikëqyrja civile e forcave të sigurisë dhe bashkëjetesa multietnike tregojnë një argument bindës për anëtarësimin në NATO.
Për më tepër, ndërsa forcat kundërshtare vazhdojnë të destabilizojnë rajonin, shtimi i Kosovës në aleancën e NATO-s do të shërbente si një kundërpeshë e nevojshme për të dekurajuar përpjekje të tilla armiqësore dhe për të parandaluar një katastrofë tjetër globale që të ndodhte në Ballkan.
Katër shtete anëtare të NATO-s – Greqia, Rumania, Sllovakia dhe Spanja, ende nuk e kanë njohur sovranitetin e Kosovës. Meqenëse NATO vepron me konsensus, kjo mungesë njohjeje paraqet një pengesë të konsiderueshme për aftësinë e Kosovës për të avancuar zyrtarisht drejt anëtarësimit, duke përfshirë pjesëmarrjen në mekanizmat kryesorë të pranimit, siç janë Partneriteti për Paqe dhe Plani i Veprimit për Anëtarësim.
Rezoluta i nxit këta katër aleatë të rishqyrtojnë qëndrimet e tyre, duke theksuar se njohja më e gjerë e Kosovës është thelbësore për të zhbllokuar rrugën e saj drejt integrimit në NATO dhe për të mbyllur një boshllëk strategjik në Evropën Juglindore.
“Shtetet e Bashkuara duhet të inkurajojnë Greqinë, Rumaninë, Sllovakinë dhe Spanjën të rishqyrtojnë qëndrimet e tyre dhe të sigurojnë që Kosova të ketë një rrugë të besueshme dhe të arritshme drejt anëtarësimit (ne NATO)”, tha Kongresmeni Self.
Ne rezolutë theksohet gjithashtu se anëtarësimi I Kosovës në aleancë, është thelbësor për të mbrojtur interesat e sigurisë kombëtare të Shteteve të Bashkuara në Evropën Juglindore.
Ushtruesja e detyrës së presidentit në Kosovë, Albulena Haxhiu, shprehu mirënjohjen për rezolutën, duke theksuar se Kosova duhet të zërë vendin që i takon në familjen euroatlantike.
