Kina ka kritikuar projektligjin e Bashkimit Evropian që synon forcimin e bazës industriale të bllokut duke paralajmëruar se mund të ndërmarrë kundërmasa nëse interesat e kompanive kineze dëmtohen.
Sipas Ministrisë kineze të Tregtisë, projektligji i njohur si “Industrial Accelerator Act” (IAA) përmban pengesa serioze për investimet dhe diskriminim institucional në sektorë kyç si bateritë, automjetet elektrike (EV), fotovoltaikët dhe mineralet e rralla.
Autoritetet në Pekin thanë se më 24 prill i kanë paraqitur Bashkimit Evropian shqetësimet dhe rekomandimet e tyre, duke paralajmëruar se mund të reagojnë nëse këto nuk merren parasysh.
Nga ana tjetër, Bashkimi Evropian synon përmes këtij ligji të forcojë pozicionin në industri strategjike, të mbrojë dhe krijojë vende pune, si dhe të vendosë kërkesa “Made in Europe” për prokurimet publike, sipas informacioneve nga Brukseli.
Kina, një konkurrente e fortë e industrisë evropiane, pritet të ndikohet veçanërisht nga rregullat më të rrepta për investimet e huaja direkte, të cilat kërkojnë miratim për marrëveshje të mëdha.
Masat synojnë të mbrojnë kompanitë në sektorë si bateritë, automjetet elektrike, panelet diellore dhe lëndët e para kritike nga blerjet prej investitorëve jashtë BE-së.
Ministria kineze theksoi tre shqetësime kryesore: ligji mund të shkelë marrëveshjet ndërkombëtare, të diskriminojë investitorët kinezë dhe të dëmtojë konkurrencën e ndershme.
Po ashtu, Pekini paralajmëroi se këto masa mund të ngadalësojnë tranzicionin e gjelbër të BE-së.
Kina i bëri thirrje BE-së të heqë kërkesat ndaj investitorëve të huaj, kushtet për përmbajtje lokale dhe transferimin e detyruar të pronësisë intelektuale nga projektligji.
