Një video e shpërndarë në rrjetet sociale, ku pretendohej se disa gra të mbuluara komunikonin në mënyrë të dyshimtë me të mitur, ka nxitur reagimin e Policisë së Shtetit.
Në një njoftim zyrtar, autoritetet bëjnë me dije se strukturat e specializuara kanë nisur menjëherë verifikimet dhe hetimet përkatëse, duke arritur të identifikojnë dy shtetaset që shfaqeshin në pamjet e publikuara.
Sipas Policisë, shtetaset me inicialet M. G. dhe A. G. janë shoqëruar më 21 prill 2026 në ambientet e Drejtorisë Vendore të Policisë Tiranë, ku janë kryer veprimet e mëtejshme procedurale.
Nga hetimet paraprake ka rezultuar se të dyja gratë janë me shtetësi iraniane dhe ndodhen në Shqipëri të pajisura me leje qëndrimi për arsye humanitare.
Policia sqaron se, deri në këtë fazë të hetimeve, nuk ka asnjë provë që këto shtetase të kenë kryer veprime të kundërligjshme ndaj të miturve, duke garantuar qytetarët se nuk ekziston asnjë rrezik për sigurinë e tyre.
Materialet procedurale i janë referuar Prokurorisë pranë Gjykatës së Juridiksionit të Përgjithshëm Tiranë për vlerësim dhe ndjekje të mëtejshme.
Reagim i Policisë së Shtetit
Duke marrë shkas nga një lajmin i publikuar në rrjetet sociale, ku pretendohej se disa gra të mbuluara komunikonin në mënyrë të dyshimtë me të mitur, strukturat e specializuara të Policisë së Shtetit nisën menjëherë me iniciativë, verifikimet dhe hetimet përkatëse.
Si rezultat i veprimeve të kryera, u bë i mundur identifikimi i dy shtetaseve që shfaqen në videon e publikuar.
Shtetaset, me inicialet M. G. dhe A. G., u shoqëruan më datë 21.04.2026 në ambientet e Drejtorisë Vendore të Policisë Tiranë, për kryerjen e veprimeve të mëtejshme procedurale.
Nga verifikimet e deritanishme rezulton se këto shtetase janë me shtetësi iraniane dhe janë të pajisura me leje qëndrimi në Republikën e Shqipërisë, për arsye humanitare.
Në përfundim të veprimeve hetimore paraprake, nuk ka rezultuar që këto shtetase të kenë kryer veprime të kundërligjshme ndaj të miturve.
Policia e Shtetit garanton qytetarët se, në këtë rast, nuk ekziston asnjë rrezik për sigurinë e të miturve.
Materialet procedurale i janë referuar Prokurorisë pranë Gjykatës së Juridiksionit të Përgjithshëm Tiranë, për vlerësim dhe ndjekje të mëtejshme.
