Ish-kryebashkiaku i Rrogozhinës, Edison Memolla, i është drejtuar Gjykatës së Lartë me rekurs kundër vendimit të GJKKO-së, e cila e ka dënuar me një vit burgim.
Në kërkesën e tij, Memolla synon rrëzimin e vendimit të Gjykatës së Posaçme, ndërsa ndaj tij rëndon akuza për “korrupsion në zgjedhje”.
Rekursi është paraqitur jo vetëm nga Memolla, por edhe nga Ndriçim Tafxhafa dhe Blerim Xhamani. Për shqyrtimin e çështjes është caktuar si relator Genti Shala. Pas vendimit të Apelit të Gjykatës së Posaçme, Memolla u vetëdorëzua pranë autoriteteve policore dhe më pas u dërgua në institucionin e vuajtjes së dënimit në Rrogozhinë, ku po vuan aktualisht dënimin.
Hetimet ndaj tij nisën pas publikimit të një audio-përgjimi, ku Memolla, në kohën kur ishte kandidat për kryetar bashkie, dëgjohej duke ndërhyrë te një punonjës i OSHEE-së për të shmangur ndërprerjen e energjisë elektrike për një abonent debitor.
Ndërkohë, Bashkia e Rrogozhinës aktualisht drejtohet nga një kryetar i komanduar.
