Presidenti ukrainas, Volodymyr Zelensky, ka deklaruar se arritja e një marrëveshje paqeje me Rusinë është shumë larg.
“Rusia po i lëviz trupat dhe forcat ushtarake në mënyrë të tillë që të nisin operacione të tjera ofensive,” tha Zelensky në një video të publikuar në rrjetet sociale.
“Pati një raport nga inteligjenca dhe komanda ushtarake mbi atë që Putini po përgatit në të vërtetë, duke përfshirë operacionet ushtarake. Ai definitivisht nuk po përgatitet për një armëpushim apo përfundim të luftës. Putin është i vendosur të zhvillojë një takim me Trump si një fitore personale dhe pastaj të vazhdojë të veprojë njësoj si më parë, duke ushtruar të njëjtin presion mbi Ukrainën.”
Zelensky beson se takimi mes presidentit amerikan dhe atij rus nuk do të sjellë paqe në vendin e tij.
“Deri më tani, nuk ka asnjë tregues se rusët po përgatiten për një situatë pas luftës. Nëse dikush po përgatitet për paqe, kjo nuk është ai.”
Të premten, Donald Trump është planifikuar të takohet me Vladimir Putin në Alaska për të diskutuar përfundimin e luftës në Ukrainë.
Kreu i Shtëpisë së Bardhë ka deklaruar se do të ushtrojë presion mbi Putin për të arritur një armëpushim, ndërsa ka paralajmëruar se do të diskutohet për lëshime territoriale, gjë që kundërshtohet rreptësisht nga Zelensky dhe aleatët e tij evropianë.
