Zyra e Inspektorit të Lartë të Drejtësisë (ILD) ka finalizuar deri më tani 21 inspektime tematike dhe institucionale në gjykata dhe prokurori në gjithë vendin, përfshirë edhe SPAK-un dhe Gjykatën e Posaçme. Nga këto, 12 inspektime janë përfunduar, me 118 rekomandime të lëna në total.
Gjatë vitit 2024, janë kryer 6 inspektime tematike me 54 rekomandime, që përfshijnë masa administrative, nxjerrje aktesh dhe veprime të brendshme për vetë ILD-në.
Fokusi i inspektimeve ka qenë në trajtimin e ankesave për “lirimin me kusht”, masat e sigurimit për armëmbajtje pa leje, ndarjen e çështjeve me short, zëvendësimin e prokurorëve, si dhe mënyrën e caktimit të çështjeve.
Kontrolle janë zhvilluar edhe në Gjykatën e Lartë, në gjykatat e zakonshme dhe ato të posaçme, ku është verifikuar respektimi i procedurave, përdorimi i sistemit elektronik, si dhe shpallja dhe arsyetimi i vendimeve. Në disa raste, ILD është vënë në lëvizje edhe nga ankesa të qytetarëve.
