Gjykata Kundër Korrupsionit dhe Krimit të Organizuar, GJKKO, kaloi këtë të mërkurë, 23 korrik, për gjykim dosjen ndaj deputetit demokrat Asllan Dogjani.
Ai akuzohet nga Prokuroria e Posaçme për fshehje pasurie. Sipas akuzës, Dogjani dyshohet se ka fshehur blerjen e një apartamenti me vlerë mbi 120 mijë euro.
GJKKO më herët e kishte kthyer dosjen e Prokurorisë së Posaçme në ngarkim të tij për plotësim hetimesh. Dogjani u mor i pandehur nga Prokuroria e Posaçme në dhjetor të vitit 2024.
Në atë kohë, SPAK sqaroi se Dogjani, nëpërmjet dy kontratave të dubluara, fshehu përmes deklarimit të rremë mënyrën e përfitimit të apartamentit në Tiranë, në rrugën “Hamid Shijaku”.
Të dyja deklaratat mbanin të njëjtin numër protokolli, por kushte të ndryshme për përfitimin e pasurisë.
