Një 32-vjeçare nga Tirana është marrë nën hetim nga Policia e Tiranës, pasi është denoncuar në polici nga një 25-vjeçare, e afërme e saj, për falsifikim dhe mashtrim
D.C dyshohet se ka përdorur të dhënat personale të së resë, si dhe foton e kartës së identitetit të saj, duke ndërhyrë në e-Albania dhe më pas ka aplikuar në një bankë mikrokredish.
Sipas denoncimit të 25-vjeçares, kredia është aprovuar në emrin e 25-vjeçares në vlerën 3 mijë e 500 euro.
Burime nga policia bëjnë me dije se D. C ka mundur të skanojë fytyrën e 25-vjeçares nga karta e identitetit, duke marrë më pas të dhënat në e-Albania.
Kjo nuk është hera e parë që emri i saj lidhet me veprime të tilla. Rezulton se më 25 qershor të këtij viti, ajo është ndaluar edhe nga Policia e Lezhës po për të njëjtën akuzë ku personave të ndryshëm iu merrte foto të kartës së identitetit, duke i mashtruar se ishte përfaqësuese e një shoqate bamirësie, dhe me të dhënat e tyre merrte kredi.
Në atë kohë ndalimi i saj, erdhi pas 16 kallëzimeve për këtë skemë mashtrimi.
