Amanda Dedej, një vajzë vetëm 13 vjeçe nga Lushnja, ka arritur të ngjitet në majat e sportit ndërkombëtar, duke u shpallur kampione e Botës në Ligën Rinore të Karatesë. Emri i saj nuk është i panjohur për sportdashësit shqiptarë, pasi Amanda ka vite që spikat në këtë disiplinë me përkushtim, talent dhe rezultate të jashtëzakonshme.
Fitorja historike u arrit në Kampionatin Botëror të zhvilluar në Kroaci, ku morën pjesë rreth 4 mijë sportistë nga 78 shtete të botës. Amanda dominoi në të gjitha ndeshjet, duke i fituar me rezultate të thella dhe bindëse, çka i siguroi medaljen e artë dhe titullin kampione bote.
Amanda stërvitet prej vitesh me babain e saj, Lirim Dedej, i cili është edhe trajneri i saj personal. Dyshja babë e bijë kanë ndërtuar së bashku një histori frymëzimi në sportin shqiptar, ku përkushtimi i tyre i përditshëm është shndërruar në medalje të shumta dhe krenari kombëtare.
Deri më tani, Amanda ka fituar 44 medalje të arta, një rekord i padiskutueshëm në historinë e sportit shqiptar për moshën e saj.
Ajo është shpallur më herët kampione e Shqipërisë, kampione Ballkanike, kampione Europe, dhe tashmë edhe kampione bote në Ligën Rinore të Karatesë.
