Detaje të reja mësohen nga ngjarja e së mërkurës, ku në burgun e Fushë-Krujës u shënua një shpërthim me lëndë plasëse.
Kjo e fundit, ka rezultuar të jetë artizanale, e krijuar me nitrat, raporton gazetari Besar Bajraktaraj. Sasia e lëndës eksplozive ka qenë e vogël, ndërsa ajo është hedhur nga jashtë oborrit në brendësi të perimetrit të burgut.
Bëhet me dije se në vendin ku autori ka hedhur lëndën eksplozive nuk ka survejim të mirë nga kamerat e sigurisë, duke bërë që të mos jetë qartësisht i dallueshëm momenti i hedhjes së kësaj lëndë në burg.
Sakaq, po vijohet me hapjen e plotë të pamjeve filmike nga kamerave e sigurisë.
Ende nuk dihet motivi i kësaj ngjarje, ashtu sikurse nuk ka dijeni se kush është autori.
“Rreth orës 21:00 të mbrëmjes së djeshme, në ambientet e IEVP Fushë-Krujë është dëgjuar një shpërthim brenda rrethimit. Menjëherë pas ngjarjes, janë njoftuar strukturat përkatëse: Policinë e Shtetit, Shërbimin e Kontrollit të Brendshëm të Burgjeve dhe Prokurorinë.
Nga verifikimet paraprake në vendin e ngjarjes, është konstatuar një gropë në tokë pranë zonës ku ndodhet gjeneratori, duke ngritur dyshime se shpërthimi mund të jetë shkaktuar nga një sasi e dyshuar lënde plasëse. Nga shpërthimi nuk ka asnjë person të lënduar dhe nuk ka dëme materiale.
Grupet hetimore ndodhen në ende në terren dhe po punojnë për zbardhjen e plotë të rrethanave të ngjarjes, si dhe për identifikimin e autorëve të mundshëm. Nga të dhënat e deritanishme, rezulton se lënda plasëse është hedhur në zonën e rrethimit të jashtëm, pranë rrugës kryesore. Kjo zonë nuk ndikon dhe nuk cenon sigurinë apo jetën brenda perimetrit të brendshëm të të dënuarve dhe të paraburgosurve.
Pamjet filmike të sigurisë janë administruar dhe janë marrë në cilësinë e provës materiale nga grupi hetimor. Gjithashtu, po mblidhen pamje edhe nga kamerat e sigurisë në rrugët përreth, për të ndihmuar në identifikimin e autorëve.
Drejtoria e Përgjithshme e Burgjeve garanton siguri brenda regjimit të banuar nga të paraburgosurit dhe të dënuarit”, njofton policia.
