Menjëherë pas zyrtarizimit nga Milani, Igli Tare nisi nga puna. Në mbrëmje një takim me Zlatan Ibrahimoviç, për t’i shprehur vlerësimet për trajnerin aktual Sergio Conceição.
Drejtori i ri sportiv do të takohet me teknikun, për të shqyrtuar mundësinë që ai të qëndrojë.
Gjithsesi, alternativat nuk mungojnë. Me Italianon që vendosi të vazhdojë te Bologna dhe pasiguritë për emërimin e Allegri-t, Tare ka gati listën e kandidatëve.
Përpos Roberto Mancinit, hyrja më e fundit është Thiago Motta, i cili mbylli bashkëpunimin me Juventusin.
Drejtori sportiv po punon edhe për merkaton. Në zyrën e re në Shtëpinë e Milanit, ai priti homologun e Romës, Ghisolfi për Saelemaekers, i cili ishte huazuar te verdhekuqtë.
Tare ka shënjestruar edhe Garnacho-n që pritet të largohet nga Manchester United. Synimi është ndërtimi i një skuadre protagoniste në Serie A dhe në Europë.
