Prokuroria e Posaçme kërkoi nga Gjykata të shpallë fajtor ish-prokurorin Aurel Zarka për dyshimet se është përfshirës në korrupsion dhe ka ushtruar ndikimi te kolegë të tij.
Për akuzat e korrupsionit në dy raste dhe ushtrim ndikimi të paligjshëm, SPAK kërkoi dënimin e tij me 4 vite burg.
Nëse Zarka gjendet fajtor sipas kësaj kërkese, ai do të vuajë vetëm 3 vite heqje lirie për shkak të procedimit me gjykim të shkurtuar.
Në seancën gjyqësore, Prokuroria e Posaçme tha se është gjetur e provuar se Aurel Zarka ka qenë përdorues i aplikacionit Sky Ecc dhe bisedat e kryera aty dhe verifikmet e tjera, treguan se ai u korruptua për një çështje në Gjykatën e Vlorës.
Tentoi të korruptonte një kolegun e tij në Vlorë për të pushuar një hetim dhe në 3 raste të tjera, ushtroi ndikim të paligjshëm te kolegë të tij.
Nën hetim në këtë dosje por që po gjykohen më vete janë edhe ish-OPGJ-ja Eriona Dapuaj, avokati Radovan Çela dhe Astrit Vladi.
