Deputetët e Parlamentit Evropian diskutuan për situatën në Serbi, pasi shembja e tendës së stacionit hekurudhor të Novi Sadit çoi në protesta studentore dhe qytetare me muaj kundër korrupsionit.
Ata u thanë qytetarëve dhe autoriteteve në Serbi se të gjithë duhet të kenë të drejtën e lirisë së tubimit dhe kërkuan që të hetohen të gjitha incidentet kundër studentëve dhe qytetarëve që demonstrojnë në Serbi.
Në një debat të zhvilluar në Parlamentin e BE-së në Strasburg me kërkesë të socialdemokratëve, shumica e deputetëve mbështetën protestat. Marta Kos, Komisionerja Evropiane për Fqinjësi dhe Zgjerim, tha se pjesëmarrja e qytetarëve luan rol të rëndësishëm në zhvillimin e një shoqërie demokratike.
“Siç theksova në letrën time të hapur të botuar javën e kaluar në përgjigje të letrave të shumta që Komisioni mori, vlerat themelore janë në thelb të projektit tonë të përbashkët evropian, të cilin Bashkimi Evropian pret që të gjitha vendet ta përqafojnë dhe ta respektojnë. Kjo përfshin të drejtën për t’u mbledhur, e cila duhet të shprehet në mënyrë paqësore në përputhje me ligjin, dhuna nuk duhet të lejohet dhe policia duhet të sigurojë sigurinë e protestuesve”, tha ajo.
Kos theksoi se Komisioni shpreh shqetësimin për incidentet ndaj demonstruesve dhe kërkon hetim të plotë të tyre.
