Greqia ka një president të ri. Konstantinos Tasoulas, ish-kryetar i Kuvendit dhe deputet i Demokracisë së Re, u zgjodh këtë të mërkurë si kreu i ri i shtetit.
Tasoulas, që ishte edhe kandidati i partisë në pushtet të Kyriakos Mitsotakis, siguroi 160 vota nga 300 që janë gjithsej në parlament. Në procesin e votimit morën pjesë në total 276 ligjvënës grekë.
Për të zgjedhur Tasoulas u deshën katër raunde votimi. Në të fundit mjaftonte një shumicë e thjeshtë prej 151 votash që të merrte detyrën.
Tasoulas zëvendëson në këtë detyrë Katerina Sakellaropoulou-n, mandati i të cilës mbaron më 13 Mars. Në të njëjtën ditë do të betohet edhe Tasoulas.
Në fjalën e tij pasi u zgjodh presidenti, Tasoulas bëri thirrje për përpjekje kombëtare dhe kohezion shoqëror duke shtuar se “Greqia dhe grekët kanë kërkesa për siguri kombëtare, progres, mbrojtje civile dhe drejtësi”.
