Një zjarr i madh ka përfshirë disa pallate të një kompleksi banimi në distriktin verior Tai Po të Hong Kongut të mërkurën. Shërbimet e emergjencës janë përpjekur ta vënë nën kontroll flakën.
Sipas transmetuesit publik RTHK, duke cituar policinë, disa persona janë bllokuar brenda ndërtesave, ndërsa dy persona kanë pësuar djegie të rënda. Disa punonjës të zjarrfikësve janë plagosur gjithashtu gjatë përpjekjeve për të fikur flakët.
Departamenti i zjarrfikësve njoftoi se raportet për zjarrin në Wang Fuk Court u morën në orën 14:51, dhe më pas situata u përkeqësua duke u klasifikuar si alarm i nivelit 4, niveli i dytë më i lartë, në orën 15:34.
Wang Fuk Court është një kompleks banimi i përbërë nga tetë pallate, me rreth 2 mijë njësi banimi. Disa ndërtesa përreth, që janë afër pallatit të përfshirë nga zjarri, kanë skela prej druri bambu në pjesën e jashtme.
Departamenti i Transportit të Hong Kongut njoftoi se një pjesë e tërë e autostradës Tai Po është mbyllur për shkak të zjarrit, dhe linjat e autobusëve po devijohen.
