Kandidati i së djathtës ekstreme, avokati Abelardo de la Espriella, nga lëvizja “Mbrojtësit e Atdheut”, dhe kandidati i së majtës, senatori Iván Cepeda, nga koalicioni Pakti Historik, do të përballen në raundin e dytë të zgjedhjeve presidenciale kolumbiane më 21 qershor, pasi morën numrin më të madh të votave në raundin e parë të zhvilluar dje.
De la Espriella është fituesi surprizë i raundit të parë, duke kaluar shifrën e 10 milionë votave dhe duke siguruar 43% të tyre. Cepeda u ndal në 40%, por kandidati i koalicionit të majtë Pakti Historik deklaroi se nuk do t’i njohë rezultatet e zgjedhjeve presidenciale derisa të sqarohen dyshimet lidhur me regjistrin zgjedhor dhe ankesat e paraqitura në disa qendra votimi.
“Ekziston një mospërputhje që duam ta verifikojmë në lidhje me regjistrin zgjedhor, dhe nuk bëhet fjalë për një mospërputhje të zakonshme: po flasim për 885 mijë persona”, u tha ai mbështetësve të tij në Bogota.
Pak qetësuese ishin edhe deklaratat e kandidatit që kryeson pas raundit të parë. Nga Barranquilla ai tha:
“Mos guxoni të vazhdoni t’i injoroni këto rezultate, sepse populli do të ngrihet dhe do t’ju ndëshkojë. Jeni një palë banditësh që ne do t’i dëbojmë. Demokracia duhet të ruhet me arsye ose me forcë.”
Vendin e tretë e zuri senatorja Paloma Valencia nga partia Qendra Demokratike Uribiste, e cila mori 6% të votave, një rezultat dukshëm më i ulët se parashikimet e sondazheve dhe madje më i ulët se 3.2 milionë votat që kishte marrë më 8 mars në zgjedhjet paraprake të partive të qendrës dhe të djathtës, ku ishte përzgjedhur si kandidate.
Në vendin e katërt u rendit Sergio Fajardo nga partia e qendrës Dinjitet dhe Angazhim, me 4% të votave. Një tjetër kandidate e qendrës, ish-kryetarja e Bashkisë së Bogotás, Claudia López, u rendit e pesta, duke mos arritur as 1% të votave.
