Votimi elektronik mbetet një nga prioritetet e Komisionit Qendror të Zgjedhjeve për zgjedhjet vendore të 9 majit 2027.
Kreu i KQZ-së, Ilirjan Celibashi, deklaron se synimi i institucionit është shtrirja e këtij sistemi në sa më shumë bashki, duke e konsideruar atë një mekanizëm të dobishëm për procesin zgjedhor.
Megjithatë, ai thekson se për zbatimin e tij nevojitet konsensus mes forcave politike, duke nënvizuar se kundërshtimet e Partisë Demokratike nuk kanë baza, por qëndrimi i saj nuk mund të anashkalohet.
“Nuk kemi asnjë arsye, apo akt ligjor për të kundërshtuar lidhur me këtë çështje. Jemi të angazhuar që të gjitha masat të jenë të përshtatshme me hartën e re administrativo-elektorale.
Pikëpamja jonë si institucion lidhur me votimin elektronik është e pandryshuar. Ne kemi dashur dhe duam që kjo mënyrë të shtrihet sa më gjerë edhe në këto zgjedhje.
PD është partia kryesore e opozitës, është fakt që në gjykimin tim ne nuk mund ta injorojmë qëndrimin e saj lidhur me këtë çështje, edhe pse shkaqet pse kjo parti kundërshton janë të pabaza. KQZ nuk është palë në këtë çështje. Kjo është një çështje e vetë partive politike.
Do të ishte mirë që të kishte një konsensus për këtë, përndryshe për KQZ-në ngel e vështirë, për të mos thënë e pamundur, që të marrë një vendim në interes të një pale. Shkaqet e ngritura nga PD lidhur me shqetësimet e këtij sistemi nuk qëndrojnë.
E rikonfirmoj që për ne si institucion do të ishte me dobi, e mbështesim dhe do të punojmë që votimi elektronik të shtrihet në sa më shumë bashki. Partitë të bashkëpunojnë me njëra-tjetrën dhe të gjejnë një konsensus”, tha Celibashi.
