Zëvendëspresidenti i Iranit, Mohammed Javad Zarif ka dhënë dorëheqjen, duke u larguar nga kabineti i presidentit Massud Pezeshkian vetëm 11 ditë pas emërimit të tij.
“Nuk jam i kënaqur me punën time dhe më vjen keq që nuk kam mundur të përmbush pritshmëritë”,shkroi ai në X.
Zarif la të kuptohet se zgjedhja e ministrave për kabinetin e ri të Pezeshkian ka qenë arsyeja e vendimit të tij. Të paktën shtatë nga 19 ministrat e emëruar nuk ishin zgjedhja e tij e parë.
Tërheqja e Zarif është “goditja” e dytë për Pezeshkian që kur ai mori detyrën në fund të korrikut, pas vrasjes së liderit militant palestinez të Hamasit, Ismail Haniyeh në Teheran.
Zarif ishte krahu i djathtë i Pezeshkian gjatë fushatës së tij zgjedhore presidenciale dhe, për shkak të popullaritetit të tij, ai luajti gjithashtu një rol kyç në fitoren e Pezeshkian.
Pas zgjedhjeve, Zarif dhe një grup ekspertësh do të përpilonin një listë të kandidatëve për postet qeveritare – që do të zbatonin reformat e premtuara.
Pezeshkian paraqiti dje një listë – që vëzhguesit besojnë se nuk përputhej me planet dhe premtimet e reformës. Vëzhguesit supozojnë se fraksioni konservator i linjës së ashpër të Iranit imponoi disa ministra Pezeshkianit.
Zarif ishte gjithashtu një nga figurat kryesore të Pezeshkian – në zbatimin e linjës së tij të re të politikës së jashtme.
Zarif ishte kryediplomati i vendit midis viteve 2013 dhe 2021 dhe arriti të përfundonte marrëveshjen ndërkombëtare bërthamore me gjashtë fuqitë botërore në 2015 si kreu i ekipit negociator iranian.
Me ndihmën e Zarif dhe të një ekipi të ri diplomatësh, Pezeshkian shpresonte të rifillonte negociatat bërthamore – në mënyrë që të hiqte sanksionet që po paralizonin ekonominë iraniane.
