Ministria e Bujqësisë dhe Zhvillimit Rural, pas prezencës së gripit të shpendëve, Influencës Aviare (H5N1), në një fermë oborri familjar në Mëzez, të Kasharit, ka marrë të gjitha masat dhe njofton se situata është nën kontroll.
MBZHR njofton se pas marrjes së konfirmimit nga Instituti i Sigurisë Ushqimore dhe Veterinarisë për prezencën e kësaj sëmundjeje, është ngritur Qendra Kombëtare e Krizës, e cila zhvilloi takimin e parë dhe parashtroi detyrat operacionale.
Sipas MBZHR-së, ekspertët e MBZHR dhe AKVMB kanë inspektuar nga afër vatrën e identifikuar si pozitive, në fshatin Mëzez. Shërbimi Veterinar vijon të mbikëqyrë dhe monitorojë nëpërmjet kampionimit edhe ferma të tjera të vogla familjare rreth kësaj zone, për t’i dërguar ato pa vonesë në Laboratorin e Referencës, ISUV.
Ndërkohë është në fuqi Urdhri i ministrit “Për miratimin e planit të kontigjencës për sëmundjen e Influencës Aviare”, i cili përcakton modalitetet e mbajtjes nën kontroll të sëmundjes.
Gjithashtu Shërbimi Veterinar i AKVMB ka karantinuar vatrën dhe zonat e mbrojtjes dhe mbikqyrjes, me qëllim izolimin dhe parandalimin e përhapjes së infeksionit, teksa është njoftuar Instituti i Shëndetit Publik, për të kryer procedurat e nevojshme për kontrollin dhe vlerësimin e riskut.
MBZHR njofton se, janë informuar fermerët, mbarështuesit e shpendëve të çdolloj specieje, se është ndaluar lëvizja, tregtimi dhe shitja e shpendëve nga fermat e zonave të bashkive Tiranë, Vorë dhe Kamëz.
Ministria udhëzon shpendërritësit në të gjithë vendin, të marrin masa për zbatimin e biosigurisë në fermat dhe mjediset ku ata mbarështojnë shpendë, si dhe të kryejnë lëvizjen e shpendëve për qëllime tregtare vetëm pasi të jenë autorizuar nga Veterineri Zyrtar i Shërbimit me Certifikatën Veterinare të Lëvizjes së Kafshëve.
MBZHR u bën apel fermerëve që për çdo rast dyshimi të komunikojnë menjëherë me shërbimin veterinar rajonal.
“Ministria e Bujqësisë dhe Zhvillimit Rural informon se situata e garantimit të zinxhirit të sigurisë ushqimore është nën kontroll. Deri më tani nuk ka prova epidemiologjike dhe shkencore se ky virus transmetohet nëpërmjet konsumit të produkteve me origjinë shtazore dhe rekomandohet që konsumi i këtyre produkteve të bëhet pas trajtimit termik, me temperaturë të larta mbi 75 gradë Celsius”, thuhet në njoftimin e MBZHR-së.
