Vullkani Etna i Italisë, më aktivi në Evropë, shpërtheu në mënyrë spektakolare duke ndriçuar qiellin mbrëmjen e së dielës.
Shpërthimi i përqendruar në kraterin juglindor të vullkanit dërgoi në qiell shtëllunga të mëdha tymi dhe hiri, ndërsa lartësia e llavës sipas të dhënave nga Institutit Kombëtar të Gjeofizikës dhe Vullkanologjisë, arriti në 4.5 km.
Hiri i llavës ra në disa fshatra të zonës, si Milo dhe Zafferana Etnea dhe pavarësisht aktivitetit të vullkanit, aeroporti i Katanias qëndroi i hapur.
Sipas autoriteteve italiane, nuk ka pasur pasur të lënduar dhe as dëme.
Vullkani 3.200 metra i lartë shpërthen disa herë në vit, duke nxjerrë llavë e duke hedhur hi mbi ishullin mesdhetar të Siçilisë.
Etna mbetet një destinacion turistik tejet popullor. Edhe pse nuk përbën rrezik për popullsinë lokale, sërish monitorohet me shumë rreptësi.
