Gjykata Themelore ne Prishtinë ua ka vazhduar masën e paraburgimit edhe për dy muaj, Naim Murselit, Kushtrim Kokallës dhe Granit Plavës, të dyshuar për vrasjen e Liridona Ademajt në nëntor të vitit 2023.
Lajmin e ka konfirmuar për Radion Evropa e Lirë bashkëpunëtorja profesionale në Gjykatën Themelore në Prishtinë, Medina Gashi.
“Ju informoj se të pandehurve N.M, G.P dhe K.K iu është vazhduar masa e paraburgimit për dy muaj me Aktvendimin e datës 23.08.2024, e cila masë do t’iu llogaritet nga data 26.08.2024 deri me datë 25.10.2024, nën kushtet ligjore të parapara në KPPK”, tha Gashi përmes një përgjigje të shkuar.
Liridona Murseli, u vra në moshën 30-vjeçare, më 29 nëntor të vitit të kaluar, në rrugën “Dalip Alshiqi” në Prishtinë.
Fillimisht, Policia e Kosovës, e kishte raportuar rastin si “grabitje me pasoja të vrasjes”.
Por dy ditë më vonë, më 1 dhjetor 2023, Policia njoftoi për arrestimin e dy personave përfshirë bashkëshortin e saj, Naim Murseli.Nga viti 2010 deri më tani në Kosovë janë vrarë rreth 60 gra.
Organizatat për mbrojtjen e të drejtave të njeriut, në disa raste, kanë fajësuar autoritetet për dështim në mbrojtjen e grave të rrezikuara nga dhuna. Në të shumtën e rasteve, autorë të vrasjeve kanë qenë bashkëshortët, pastaj baballarët dhe djemtë.
