Bashkimi Evropian duhet të fillojë “bisedat” për blerjen e armatimeve për Ukrainën duke përdorur fitimet nga asetet e ngrira ruse, u tha sot ligjvënësve presidentja e Komisionit Evropian, Ursula Von Der Leyen.
“Është koha për të filluar “bisedën” rreth përdorimit të fitimeve të papritura të aseteve të ngrira ruse për të blerë së bashku pajisje ushtarake për Ukrainën”, tha Von der Leyen duke iu drejtuar Parlamentit Evropian, në Strasburg.
Vendet anëtare të BE-së kanë rënë dakord në parim që kthimet e aseteve të ngrira ruse, megjithëse jo vetë asetet, mund të përdoren për të mbështetur Ukrainën, si për shembull duke rindërtuar infrastrukturën e dëmtuar nga lufta.
Por, ata presin që komisioni të dalë me një propozim ligjor për ta zbatuar atë në praktikë.
Nëse fitimet mund të përdoren për të blerë pajisje ushtarake dhe armë, e jo për qëllime civile, deri më tani ka qenë kryesisht një çështje spekulimi.
Por, fjalimi i sotëm i Von der Leyen është treguesi i parë i qartë se komisioni mund të mbështeste idenë.
“Nuk mund të ketë asnjë simbol më të fortë dhe asnjë përdorim më të madh për ato para sesa ta bëjmë Ukrainën dhe të gjithë Evropën një vend më të sigurt për të jetuar”, tha Von der Leyen.
Presidentja e komisionit tha gjithashtu se Evropa duhet të parandalojë fitoren ruse në Ukrainë me ose pa mbështetjen e partnerëve.
Megjithatë, Von der Leyen nuk e përmendi SHBA-në, ku mbështetja e Kongresit për ndihmën e vazhdueshme ushtarake po reduktohet dhe Donald Trump, i cili doli kundër paketës së ndihmës prej 60 miliardë dollarësh për Ukrainën ende në pritje në Dhomën e Përfaqësuesve të SHBA-së, duket se do të jetë kandidati republikan në zgjedhjet presidenciale të këtij viti.
“Ne nuk kemi kontrollin e zgjedhjeve apo vendimeve në pjesë të tjera të botës”, tha Von der Leyen.
“Me ose pa mbështetjen e partnerëve tanë, ne nuk mund ta lëmë Rusinë të fitojë”, theksoi ajo.
