Ashtu siç ishte parashikuar, IKMT ka shembur sot me shpërthim të kontrolluar një pallat 6-katësh në zonën e Astirit, në Tiranë, për t’i hapur kështu rrugë projektit të Unazës së Madhe.
Gazetari Erjon Skëndaj pohoi më herët për “BalkanWeb” se në ndërtesë u hapën 250 vrima dhe u përdorën 10 kg lëndë plasëse. Teksa u transmetua livie në ‘News24’ pallati u hodh në erë, ndërsa operacioni rezultoi i suksesshëm. Pavarësisht shtëllungave të mëdha të tymit, forcat e zjarrfikëses ndërhynë për të bërë të mundur lokalizimin e tij, përmes hedhjes së ujit.
“IKMT do të shembë sot në orën 15.30 me shpërthim të kontrolluar një objekt 6 katësh në zonën e “Astir” në gjurmën ku do te kaloje Unaza e re. Ne trupin e objektit jane hapur 250 furnela (vrima) ku do te vendosen 10 kg lende plasëse”, thuhej në njoftimin e IKMT.
Ditën e djeshme, IKMT shembi pesë ndërtesa të tjera, ku fatmirësisht aksioni ishte i qetë dhe pa rezistencën e banorëve, ndonëse zona ishte rrethuar me polici dhe qarkullimi u bllokua për disa orë.
(BalkanWeb)
