E Ngarkuara me Punë e Shteteve të Bashkuara të Amerikës, Nancy VanHorn u takua sot me Komisionerin Shtetëror të Zgjedhjeve, Ilirjan Celibashi, pas një vizite të këtij të fundit dhe ekipit të KQZ-së në SHBA, si pjesë e Programit të Vizitorëve Ndërkombëtarë dhe Lidershipit të Departamentit të Shtetit.
Sipas njoftimit të ambasadës së SHBA-ve në vendin tonë, kjo “vizitë u dha zyrtarëve të KQZ-së mundësinë për të mësuar mbi praktikat elektorale në SHBA dhe për të forcuar lidhjet profesionale. Komisioneri Celibashi informoi për përgatitjet e KQZ-së përpara zgjedhjeve parlamentare të majit”.
E Ngarkua me Punë e SHBA-ve, VanHorn shprehu mbështetjen e fortë të SHBA-së për përpjekjet e KQZ-së për të siguruar zgjedhje të drejta dhe transparente, duke theksuar rëndësinë e lejimit të institucioneve si KQZ-ja të funksionojnë pa ndërhyrje.
