Muhamed Kununu, zëdhënësi ushtarak i qeverisë, tha të martën se sulmet ajrore u kryen kundër milicëve të Haftarit dhe automjeteve ushtarake.
Ai tha se janë kryer fluturime zbulimi në zonat qendrore dhe perëndimore me qëllim të monitorimit të lëvizjeve të milicëve të Haftarit në terren.
Më parë gjatë ditës, njësitë e artilerisë së ushtrisë libiane sulmuan pozita në bazën ajrore Al-Watiya si dhe një bazë të përdorur nga mercenarët e Grupit Wagner të Rusisë, të cilët e mbështesin atë.
Al-Watiya, e cila aktualisht kontrollohet nga forcat besnike të Haftarit, vlerësohet si baza kryesore ajrore në vend dhe është e dyta pas Aeroportit Ndërkombëtar Mitiga.
Aeroporti i pushtua në gusht të vitit 2014 nga forcat e komandantit puçist Haftar, udhëheqësi i forcave të armatosura të paligjshme në lindje të Libisë, i cili e përdori atë si bazën e tij për operacionet në perëndim të vendit.
Haftari ka intensifikuar sulmet ndaj civilëve që nga fillimi i majit pasi Ushtria Libiane kohët e fundit arriti një avantazh duke i shkaktuar humbje të konsiderueshme milicisë së tij.
Qeveria ka qenë nën sulm nga forcat e Haftarit që nga prilli i vitit 2019, me më shumë se 1.000 të vrarë në dhunë. Ajo filloi operacionin “Stuhia e Paqes” më 26 mars për të kundërshtuar sulmet ndaj kryeqytetit.
Pas rrëzimit të sundimtarit të ndjerë Muammar Gaddafi në vitin 2011, në 2015 u themelua qeveria e Libisë nën një marrëveshje politike të udhëhequr nga OKB-ja.
