Gjykata e Apelit ka vendosur sot në 24 janar të lërë në fuqi masat e sigurisë për gjashtë shtetas të akuzuar për trafikim të lëndëve narkotike dhe organizim të një grupi të strukturuar kriminal. Mes të akuzuarve është edhe djali i ish-deputetit të Partisë Socialiste, R.R.
Shtetasit për të cilët u konfirmua masa e sigurisë janë: I.S, R.Rr, P.Rr, G.Rr, A.Gj, Z.A, J.V, M.B. Nuk bënë ankim shtetasit S.Q. dhe A.N.
Sipas aktakuzës, ata dyshohen se kanë kryer veprat penale “Trafikim i lëndëve narkotike në bashkëpunim” dhe “Organizim i grupit të strukturuar kriminal”, të parashikuara nga nenet 283/a/1 dhe 28 pika 4 të 333/a, si dhe neni 334/1 i Kodit Penal.
Hetimet e deritanishme tregojnë se baza kryesore e grupit dyshohet të ketë qenë në Nikël.
Forcat e rendit kanë kryer kontrolle të vazhdueshme në bazat e grupit, banesat dhe ambientet e lidhura me të arrestuarit. Qëllimi i këtyre kontrolleve është mbledhja e provave të mjaftueshme për të dokumentuar plotësisht aktivitetin e dyshuar kriminal dhe lidhjet e mundshme të personave të tjerë me këtë grup.
Sipas SPAK, grupi ka transportuar marijuanë dhe kokainë nga Shqipëria dhe Amerika e Jugut drejt vendeve të BE-së dhe Turqisë. Hetimet zbuluan tre raste kryesore gjatë viteve 2020-2021, ku u sekuestruan mbi 2 ton drogë në vende të ndryshme si Mali i Zi, Holanda dhe Turqia.
