Policia e Tiranës njofton arrestimin e një 38-vjeçari të dyshuar për trafik automjetesh të vjedhura nga Zvicra në Shqipëri.
Seksioni për Hetimin e Trafiqeve të Paligjshme i Drejtorisë Vendore të Policisë Tiranë ka finalizuar me sukses operacionin “Swiss”, në kuadër të një procedimi penal të nisur në vitin 2024.
Operacioni çoi në arrestimin e shtetasit A. Sh., 38 vjeç, banues në Zvicër, i dyshuar për trafikimin në Shqipëri të dy automjeteve të markës “Audi”, që ishin vjedhur në Zvicër dhe kishin një vlerë prej 150,000 eurosh.
Policia ka sekuestruar një prej këtyre automjeteve, një “Audi Q8”, të cilin e gjeti në një vendparkim në zonën e Don Boskos në Tiranë.
Vijojnë hetimet për gjetjen e automjetit tjetër të trafikuar. Materialet procedurale i janë kaluar Prokurorisë për veprime të mëtejshme.
