Pas rreth tri javësh nga tentativa e vrasjes në rrugën “Ramadan Citaku”, specialistët e Sektorit për Hetimin e Krimeve ndaj Personit, në bashkëpunim me shërbimet e Komisariatit të Policisë Nr. 3, finalizuan sot më 18 dhjetor 2025, operacionin “Akuza” dhe lokalizuan autorin e dyshuar. Sipas njoftimit zyrtar të policisë, pas hetimeve ka rezultuar se shtetasi F. F. ka plagosur me armë zjarri, për motive të dobëta, shtetasin M. J., dhe pas krimit është ndihmuar nga shtetasi I. L., për t’u larguar nga vendi i ngjarjes.
Policia njofton se gjatë operacionit u lokalizuan dhe u ndaluan tre persona. U ndalua shtetasi F. F., 36 vjeç, pasi Gjykata i ka caktuar masën e sigurisë ‘Arrest në burg’, për veprat penale ‘Vrasja me paramendim’, mbetur në tentativë, dhe ‘Mbajtja pa leje dhe prodhimi i armëve, armëve shpërthyese dhe municionit’”. Ndërsa shtetasi I. L., 32 vjeç, u arrestua gjithashtu, pasi gjykata i ka caktuar masën e sigurisë ‘Arrest në burg’, për veprën penale ‘Përkrahja e autorit të krimit’”.
Përveç tyre, policia njofton se u arrestua në flagrancë shtetasi M. N., 30 vjeç, i cili ndihmoi autorin gjatë lëvizjes së tij nga Instituti deri në bulevardin ‘Nënë Tereza’”. Sipas njoftimit, 36-vjeçari F. F. u lokalizua dhe u kap pas ndjekjes së automjetit me të cilin ai lëvizte së bashku me shtetasin M. N.
Operacioni i zhvilluar nga specialistët e policisë ishte rezultat i një pune intensive informative dhe ndjekjeje, për të kapur autorin e plagosjes me armë zjarri të shtetasit M. J., më 23 nëntor 2025. Policia thekson se materialet procedurale iu referuan Prokurorisë së Tiranës, për veprime të mëtejshme.
