Persona të armatosur kanë sulmuar një maternitet në Kabul, duke shkaktuar një betejë zjarri me forcat afgane, e cila ka lënë së paku katër civilë të vrarë.
Spitali, i cili ndodhet në një lagje të banuar me shiitë, udhëhiqet nga organizata ndërkmbëtare bamirëse Mjekët pa Kufij.
Ministria e Brendshme afgane ka thënë se përveç katër civilëve që janë vrarë, disa të tjerë janë plagosur.
Bëhet e ditur se një nga sulmuesit është vrarë po ashtu.
Fotografitë e shpërndara nga ministria kanë treguar fëmijë të porsalindur dhe nënat e tyre duke u evakuuar nga spitali.
Përgjegjësinë për sulmin nuk e ka marrë asnjë grup.
Në një mesazh dërguar Radios Evropa e Lirë, zëdhënësi i talibanëve, Zabihullah Mujahid, ka mohuar se grupi i tij është përgjegjës.
Edhe talibanët, edhe militantët e grupit Shteti Islamik janë aktivë në Kabul dhe zonat përreth tij.
