Një sulm me dronë ukrainas ndaj një qendre logjistike në rajonin Tambov, në perëndim të Rusisë, ka shkaktuar 7 viktima dhe 24 të plagosur, njoftuan autoritetet ruse këtë të shtunë, 18 korrik.
Guvernatori i Tambovit, Evgeny Pervyshov, tha se dronët goditën një qendër logjistike të kompanisë Wildberries në qytetin Kotovsk, duke vrarë punonjës të turnit të natës.
Sipas kompanisë, edhe një tjetër qendër logjistike në Elektrostal, në rajonin e Moskës, u sulmua.
Zjarri në objektin e Tambovit u vu nën kontroll, ndërsa ndërhyrja e zjarrfikësve vazhdoi në zonën e Moskës.
Kryebashkiaku i Moskës, Sergei Sobyanin, deklaroi se gjatë natës u nisën më shumë se 370 dronë drejt rajonit të kryeqytetit rus. Sipas tij, shumica u rrëzuan nga mbrojtja ajrore dhe 64 prej tyre u shkatërruan para se të afroheshin pranë Moskës.
Ukraina ka intensifikuar sulmet me dronë ndaj objektivave në territorin rus, duke i cilësuar ato si kundërpërgjigje ndaj sulmeve të vazhdueshme ruse ndaj qyteteve ukrainase.
Ndërkohë, përpjekjet diplomatike të udhëhequra nga SHBA-të për t’i dhënë fund luftës kanë ngecur muajt e fundit, pasi Washingtoni është fokusuar më shumë te konflikti me Iranin.
