Të paktën nëntë persona u vranë dhe disa u plagosën në një sulm rus me raketa dhe dronë në rajonin e Kievit në orët e para të mëngjesit të së hënës.
Sipas BBC, janë goditur zonat e banimit, spitalet dhe infrastrukturat sportive.
Të paktën gjashtë prej të vrarëve ishin në një ndërtesë shumëkatëshe në kryeqytet, tha kryebashkiaku i Kievit, Vitali Klitschko. Administrata ushtarake e qytetit tha se 33 persona të tjerë ishin plagosur.
Në breshërinë e fundit, u shënuan të paktën 352 dronë dhe 16 raketa ruse, të cilat shënjestruan territorin ukrainas, kryesisht në zonën e Kievit.
Rusia ka intensifikuar sulmet e saj ajrore kundër qyteteve ukrainase në javët e fundit, duke dërguar valë të mëdha raketash, dronësh dhe karremesh të projektuar për të mposhtur mbrojtjen ajrore ukrainase.
Është një taktikë kundër së cilës forcat ukrainase po përpiqen të mbrohen.
Mijëra banorë të Kievit u detyruan të hynin në strehimore në orët e para të mëngjesit të së hënës, ndërsa dronët fluturonin sipër tyre dhe shpërthimet tronditën qytetin.
Hyrja e njërit prej stacioneve të metrosë së Kievit, ku njerëzit strehohen rregullisht, pësoi dëmtime të konsiderueshme, teksa u goditën gjithashtu klasat dhe konviktet në një nga universitetet e qytetit.
