Dita Botërore e Shëndetit është një ngjarje ndërkombëtare nën kujdesin e Organizatës Botërore të Shëndetësisë (OBSH).
Për herë të parë Dita Botërore e Shëndetit u kremtua më 1950-n. Kjo ditë shënon themelimin e OBSH-së dhe ofron mundësi për të rritur ndërgjegjësimin global mbi çështjet e shëndetit publik.
Çdo vit, OBSH-ja zgjedh një temë specifike për Ditën Botërore të Shëndetit dhe organizon ngjarje ndërkombëtare, rajonale dhe lokale për të theksuar rëndësinë e saj.
Tema e Ditës Botërore të Shëndetit për vitin 2026 është “Së bashku për shëndetin. Mbështetni shkencën”. Kjo fushatë, e nisur nga OBSH-ja dhe PAHO-ja, thekson nevojën kritike për t’u mbështetur në prova shkencore, të dhëna dhe politika të bazuara në prova për të mbrojtur shëndetin e njerëzve, kafshëve dhe mjedisit, e cila shpesh quhet qasja “Një Shëndet i Vetëm”.
Qeveritë, organizatat joqeveritare dhe aktorët e tjerë të shëndetit publik bashkohen në këtë përpjekje, duke zhvilluar aktivitete dhe nisma për të promovuar shëndetin dhe mirëqenien e komuniteteve. Dita Botërore e Shëndetit është një përkujtues i rëndësishëm i përkushtimit global për një shëndet më të mirë për të gjithë.
Në këtë kuadër, edhe Akademia e Shkencave e Shqipërisë me njësitë dhe qendrat e ngritura pranë saj ka dhënë dhe vijon të japë kontribut të rëndësishëm në fushën e shëndetit publik, përmes kërkimit shkencor, studimeve ndërdisiplinore dhe promovimit të dijes. Nëpërmjet veprimtarive shkencore ASHSH ka nxitur trajtimin shkencor të çështjeve që lidhen me shëndetin e popullsisë, duke ofruar ekspertizë dhe rekomandime për institucionet vendimmarrëse.
Gjithashtu, Akademia ka mbështetur botime dhe aktivitete shkencore që synojnë rritjen e ndërgjegjësimit mbi rëndësinë e parandalimit, edukimit shëndetësor dhe përmirësimit të cilësisë së jetës. Në bashkëpunim me institucione vendase dhe ndërkombëtare, përfshirë Organizata Botërore e Shëndetësisë, ajo kontribuon në shkëmbimin e përvojave dhe në avancimin e standardeve të kërkimit në shërbim të shëndetit.
