Policia e Shtetit ka njoftuar se ka kontribuar në operacionin e koduar “Ferdinand”, të organizuar nga autoritetet spanjolle, për goditjen e një grupi kriminal të përbërë kryesisht nga shtetas shqiptarë, të akuzuar për vjedhje me armë zjarri dhe dhunë të shtuar në banesa në Spanjë.
Si rezultat i këtij operacioni, janë ndaluar 5 persona, prej të cilëve 4 janë shtetas shqiptarë, ndërsa janë sekuestruar 10 mijë e 590 euro, 4 orë dore të markave të shtrenjta dhe 1 automjet.
“Për zhvillimin e këtij operacioni, Njësia për Krimet Shëtitëse ‘Antiskifter’ në Drejtorinë për Hetimin e Krimit të Organizuar bashkëpunoi ngushtë, për rreth 2 vjet, me homologët spanjollë, nëpërmjet Oficerit Ndërlidhës në Ambasadën e Republikës së Shqipërisë, në Madrid.
Në vijim të këtij bashkëpunimi, në muajin janar 2026, Policia e Lezhës finalizoi operacionin e koduar ‘Aksi’, si rezultat i të cilit u kap njëri nga pjesëtarët e këtij grupi kriminal, shtetasi A. I..”, bën me dije Policia.
Gjithashtu, gjatë periudhës hetimore u ekzekutuan letërporosi për kryerjen e kontrolleve në disa ambiente në Shqipëri, në pronësi/përdorim të pjesëtarëve të grupit.
Vijon bashkëpunimi me homologët spanjollë, për kapjen e 2 pjesëtarëve të tjerë të këtij grupi, të shpallur në kërkim ndërkombëtar.
