Shtabi Suprem i Fuqive Aleate në Evropë (SHAPE) ka uruar sot Shqipërinë me rastin e Ditës së Pavarësisë, duke theksuar rolin e rëndësishëm të vendit në Aleancën e Atlantikut të Veriut.
Në mesazhin e publikuar, SHAPE shprehet se Dita e Pavarësisë së aleatëve shqiptarë është një ditë që festohet edhe brenda Aleancës, duke vlerësuar vigjilencën dhe kontributin e vazhdueshëm të Shqipërisë në misionet dhe operacionet e NATO-s.
“Sot është Dita e Pavarësisë së Aleatëve tanë Shqiptarë, dhe sot ne festojmë përkrah tyre! Me vigjilencën dhe kontributet e tyre të vazhdueshme në Aleancë, NATO qëndron e fortë dhe e gatshme për t’u mbrojtur nga çdo gjë. Gëzuar për ty, Shqipëri!”, theksohet në urimin zyrtar.
Sot shqiptarët, brenda dhe jashtë vendit, festojnë 113-vjetorin e shpalljes së Pavarësisë së Shqipërisë.
Më 28 Nëntor 1912, Kuvendi Kombëtar i Vlorës, i udhëhequr nga Ismail Qemali, shpalli Pavarësinë, një akt historik që vulosi aspiratat shekullore për liri dhe shtet të pavarur.
Nga ngritja e flamurit të Skënderbeut në Krujë më 28 nëntor 1443, te nënshkrimi i Aktit të Pavarësisë më 1912, kjo datë simbolizon qëndresën, unitetin dhe identitetin kombëtar.
