Sekretari i përgjithshëm i NATO-s, Mark Rutte, do të udhëtojë javën e ardhshme në Uashington për bisedime me presidentin amerikan Donald Trump, konfirmoi zëdhënësja e tij, Allison Hart.
Vizita në kryeqytetin amerikan ishte planifikuar prej kohësh, ndërsa detajet e programit pritet të publikohen në ditët në vijim.
Takimi pritet të zhvillohet në një moment të ndjeshëm për aleancën ushtarake.
Për Rutte, kjo vizitë shihet si një mundësi për të zbutur tensionet brenda NATO-s, të cilat janë shtuar pas luftës në Iran dhe qëndrimeve të ndryshme të vendeve anëtare ndaj ndërhyrjes amerikane.
Presidenti Trump ka shprehur së fundmi pakënaqësi të fortë ndaj aleatëve, duke i kritikuar për distancimin nga ndërhyrja ushtarake e SHBA-së në Iran dhe për mungesën e gatishmërisë për të marrë pjesë në misione të mundshme për mbrojtjen e transportit të naftës dhe gazit në Ngushticën e Hormuzit.
Sipas deklaratave të fundit, presidenti Trump madje po shqyrton mundësinë e tërheqjes së SHBA-së nga NATO, një lëvizje që do të kishte pasoja të mëdha për sigurinë globale dhe për vetë aleancën.
Në agjendën e bisedimeve pritet të përfshihen gjithashtu përpjekjet për t’i dhënë fund luftës së Rusisë në Ukrainë, si dhe përgatitjet për samitin e NATO-s që do të mbahet në Turqi në muajin korrik.
Në këtë samit, liderët pritet të rikthejnë në fokus ndarjen më të drejtë të barrës financiare dhe ushtarake brenda aleancës, ndërsa Trump kërkon që vendet evropiane të marrin më shumë përgjegjësi për mbrojtjen e tyre.
