Gjykata e Lartë ka rrëzuar sot, 22 nëntor, kërkesën e ish-Presidentit të vendit Ilir Meta për përjashtimin e gjyqtarit Ilir Panda nga shqyrtimi i çështjes së tij. Siç bën me dije, kërkesa është cilësuar e pabazuar.
Meta, ka bërë rekurs vazhdimisht për lirimin nga qelia e paraburgimit, ku ndodhet prej më shumë se 1 viti.
Seanca ndaj Metës do të zhvillohet më 27 nëntor, ku do të shqyrtohet sërish ankimimi për masën e “arrestit në burg”. Shkak për shtyrjen u raportua më herët mungesa e avokatit të Metës, Kujtim Cakrani, i cili ka kërkuar më parë largimin e gjyqtares Irena Gjoka nga gjykimi, duke pretenduar konflikt interesi.
Çështja penale përfshin Ilir Metën, ish-bashkëshorten e tij Monika Kryemadhi dhe tre persona të tjerë. Ata përballen me akuza që lidhen me korrupsion pasiv, pastrim parash, mosdeklarim pasurie dhe korrupsion të funksionarëve të lartë në bashkëpunim.
Meta ndodhet në burg që nga tetori i vitit 2024, ndërsa Monika Kryemadhi është nën masën “detyrim paraqitje”.
SPAK ka bashkuar në një dosje tre hetime: aferën CEZ–DIA, lobimin në SHBA dhe verifikimin pasuror.
