Kryeministri i Serbisë, Milosh Vuçeviç njoftoi në një konferencë të jashtëzakonshme për shtyp se do të heqë dorë nga posti i tij. Po ashtu, ai njoftoi se dorëheqjen do ta japë edhe kryebashkiaku i Novi Sadit, Milan Gjuriç. Vendimet e tyre vijnë pas protestave masive të studentëve në Serbi si pasojë e tragjedisë në Novi Sad.
Duke folur për mediat, Vuçeviç tha se pati një bisedë të gjatë me Presidentin e Serbisë, Aleksandër Vuçiç, i cili e pranoi vendimin e tij.
“Mendoj se duke vepruar në këtë mënyrë tregojmë përgjegjësinë e atyre që janë zgjedhur për të qenë të përgjegjshëm”, tha Vuçeviç në konferencën e jashtëzakonshme për shtyp.
Ai shtoi ndër të tjera se politikanët duhet të pranojnë përgjegjësinë dhe të tregojnë se janë gati për të çtensionuar situatat në shoqëri.
Vuçeviç u shpreh se do të qëndrojë në këtë detyrë derisa të zgjidhet një kryeministër i ri e deri atëherë e gjithë qeveria dorëhiqet dhe do të ketë vetëm mandat teknik.
“Do ta vazhdoj punën derisa të zgjidhet një kryeministër i ri. Në këtë situatë, e gjithë qeveria është në një mandat teknik, me dorëheqjen e kryeministrit bie i gjithë kabineti, nëse flasim figurativisht pasi e gjithë qeveria ka dhënë dorëheqjen”, tha ai.
Mediat serbe shkruajnë se Vuçeviç gjatë ditës së djeshme pati një takim me presidentin Vuçiç dhe kryeparlamentaren Ana Brnabiç për të diskutuar mbi kërkesat e studentëve. Vuçiç pati kërkuar një rikonstruktim të menjëhershëm të qeverisë. Dhe kjo duket se nisi me Vuçeviç.
Mijëra studentë dhe qytetarë të tjerë kërkojnë përgjegjësi penale dhe politike për tragjedinë në qytetin e Novi Sadit, ku më 1 Nëntor të vitit të kaluar, 15 persona humbën jetën nga shembja e strehës në stacionin hekurudhor.
Kërkesat e studentëve për ndalimin e bllokadave përfshijnë publikimin e dokumentacionit të plotë për rindërtimin e Stacionit Hekurudhor të Novi Sadit, për të përcaktuar përgjegjësinë për aksidentin e 1 Nëntorit 2024.
Ata gjithashtu kërkojnë që sulmuesit e demonstruesve nëpër Serbi, gjatë protestave që pasuan aksidentin, të identifikohen dhe të përballen me përgjegjësi penale.
Kërkesat përfshijnë edhe lirimin e aktivistëve të arrestuar gjatë protestave, ndalimin e procedurave penale kundër tyre, si dhe rritjen e buxhetit për universitetet.
