Procesi i rinumërimit të votave të qarkut Tiranë, si ato për subjektet politike dhe të kandidatëve, nuk pasoi në asnjë ndryshim mandatesh.
Anëtari i KAS-it, Ledio Braho, u shpreh se ky proces nuk prodhoi asnjë ndryshim, e ishte transparent si për partitë, ashtu dhe për publikun.
Lidhur me keqnumërimin e disa votave, Braho shprehet se ato mund të kenë qenë gabime njerëzore.
Sakaq, sipas Brahos, rinumërimi i ka shërbyer procesit të zgjedhjeve në terësi për transparencë, pas akuzave për manipulim apo tjetërsim të votave.
“Unë mendoj se për aq kohë sa jemi në demokraci, transparenca gjithmonë i shërben demokracisë. Qëllimi i kërkesës sonë ky ka qenë, pra, të bëhet transparencë. Pavarësisht se, siç kam thënë e herë të tjera, nuk ka pasur lëvizje të konsiderueshme votash, që të bëjnë pis procesin, është e rëndësishme që po të shohim qëndrimet e disa prej kandidatëve, që kanë ndryshuar tashmë që pas hapjes së kutive, tregon që kjo i ka shërbyer procesit.
Pra, nuk kemi më akuza për trafikim votash, sidomos brenda subjekteve, por as mes subjekteve. Të gjitha ato lëvizje që reflektohen dhe që shpesh herë konsiderohen si vjedhje, manipulim, trafikim votash, për mendimin tim nuk janë të tilla. Janë çështje gabimi njerëzor që mund të ketë ndodhur në proces numërimi në KZAZ-të apo çështje fletësh, që janë shumë të diskutueshme në lidhje me vlefshmërinë e tyre se kujt i takojnë”, tha Braho.
Anëtari i KAS, Koli Bele, ndër të tjera theksoi se duhet të jemi të kujdesshëm para se të themi që komisionerët kanë trafikuar vota, pasi presioni dhe lodhja ka qenë e madhe gjatë numërimit dhe këto gabime mund të jenë rezultat i gabimeve njerëzore.
“Duhet të kuptoni që këtu ky proces ka dy filtra të tjerë. Në qëndrën e numërimit është thjesht grupi që numëron që e hedh edhe në sistem. Ndërkohë këtu ka një kontroll, pra është tjetër operatori nga grupi i numërimit dhe ka një person i cili e konfirmon dhe përsëri në mungesë presioni edhe këtu kemi pasur gabime. Mendoni në qendrën e numërimit në orën 2 të natës kur hidhen procesverbalet. Duhet të jemi shumë të kujdesshëm para se të deklarojmë se komisionerët kanë trafikuar apo kanë vjedhur vota sepse këto kanë qenë gabime të cilat kur ndodhin në këtë situatë pa presion me dy turne, mendoni në situatën e një qendre numërimi”
