Përgatitja e patëllxhanëve të mbushur me djathë dhe proshutë pule, bëhet edhe më e shijshme kur atyre iu shtohen dy lloje djathi, të cilët i japin edhe më tepër shije.
Për të mos përmendur pastaj edhe kombinim e erëzave që i fal atë aromë unike.
Provoni ta përgatisni edhe ju vetë në shtëpi këtë recetë fantastike duke ndjekur hapat e thjeshtë si më poshtë.
Përbërësit
3 patëllxhanë
250 gr proshutë pule e pjekur
300 gr djathë kaçkavall
100 gr thërrime buke
100 gr djathë parmixhano
120 ml vaj ulliri
Kripë dhe piper për shije
1 degëz rozmarinë
Borzilok dhe majdanoz për shije
1 thelpi hudhër
Përgatitja
Fillimisht përgatisini salcën duke bashkuar vaj, kripë, piper, rozmarinë, borzilok, majdanoz dhe hudhër.
Vazhdoni duke prerë në feta patëllxhanët dhe me salcën që përgatitët lyejini një e nga një. Kuardisini lehtë në një tigan,derisa të zbuten.
Pas kësaj në fetat e patëllxhanëve shtroni nga një fileto pule dhe nga një copë të vogël djathi kaçkavall dhe në fund mbështilleni në formë roleje.
Bëni të njëjtën gjë edhe me pjesën tjetër të patëllxhanëve.
Lyeni bazën e një tave me pak vaj ulliri dhe spërkateni me thërrime buke.
Rendisni rolet dhe sipër tyre hidhni parmixhanin e grirë dhe disa copa të djathit kaçkavall.
Tavën piqeni në 200 ° për 15 minuta.
