Ministri grek Stavros Papastavru mbërriti pasditen e sotme në IEVP Durrës ku u takua me kryebashkiakun e zgjedhur të Himarës, Fredi Belerin.
Pas diskutimeve të bëra me Belerin, ministri në një prononcim për mediat deklaroi se vendimi i sovranit nuk po zbatohet akoma.
“Erdha e vizitova kryebashkiakun e Himarës që mbahet në burg këtu e 7 muaj. Fatkeqësisht në Himarë, vendimi i sovranit për votën nuk po zbatohet akoma. Himara është e vetmja bashki në Europë ku kryetari i humbur vazhdon të drejtojë bashkinë dhe kryetarit të zgjedhur po i mohohet e drejta për t’u zgjedhur.
Ne i gjendemi pranë Fredi Belerit për një gjyq të drejtë dhe duam që prezumimi i pafajësisë së tij të respektohet nga drejtësia shqiptare. Duhet gjetur një zgjidhje në kuadrin e së drejtës evropiane dhe shtetit të së drejtës dhe ëndrrës evropiane që të kthehet normaliteti në Bashkinë e Himarës”, u shpreh Papastavru.
Ky takim u zhvillua një ditë para seancës gjyqësore të Belerit, i cili është në pritje të gjykimit.
Athina zyrtare vijon ta mbështesë kryebashkiakun e zgjedhur të Himarës që nga momenti i arrestimit.
Papastavru është ministri i dytë grek, pas ministrit të Mbrojtjes së Qytetarit në shtator, që takon kryebashkiakun e zgjedhur të Himarës në burgun e Durrësit.
Fredi Beleri nuk është lejuar ende të bëjë betimin si kryebashkiak, ndërsa u arrestua dy ditë para zgjedhjeve vendore të 14 majit. Sipas organit të akuzës, ka prova që tregojnë se ai ka ofruar para në këmbim të votave.
