Një raport ndërkombëtar tha se prodhuesit e naftës dhe gazit po përballen me “momentin e së vërtetës” për të përqafuar një zhvendosje drejt energjisë së pastër ose për të vazhduar thellimin e krizës klimatike.
Mbikëqyrësi global i energjisë, Agjencia Ndërkombëtare e Energjisë (IEA), publikoi një raport për të ardhmen e lëndëve djegëse fosile dhe tha se prodhuesit e naftës dhe gazit duhet të bëjnë një zgjedhje për rolin e tyre në sistemin global të energjisë.
Raporti u publikua përpara samitit të Klimës të Kombeve të Bashkuara, ose COP28, i cili fillon në Dubai javën e ardhshme dhe përcakton se çfarë duhet të bëjë industria për t’u përafruar me Marrëveshjen e Parisit.
Raporti tha se emetimet e industrisë duhet të ulen me 60% deri në vitin 2030 për të mbajtur ngrohjen globale në një nivel prej 1,5 gradë dhe të zvogëlojë emetimet me 75% për të arritur objektivin neto të vitit 2050.
Drejtori ekzekutiv i IEA-së, Fatih Birol tha se prodhuesit e naftës dhe gazit duhet të marrin vendime të rëndësishme për vendin e tyre, në sektorin e energjisë.
Raporti tha se investimi vjetor prej 800 miliardë dollarësh në sektorin e naftës dhe gazit përbën dyfishin e asaj që nevojitet për të arritur objektivat klimatike deri në vitin 2030.
