Ministrja e Shëndetësisë dhe Mirëqenies Sociale, Evis Sala, ka theksuar se përmirësimi i diagnostikës është një nga prioritetet kryesore të mandatit të saj, me fokus të veçantë te sëmundjet e rralla. Në mesazhin e saj gjatë një mesazhi në ‘Facebook’, dedikuar kësaj fushe, Sala u shpreh se integrimi i inovacionit shkencor me politikat publike dhe praktikat klinike është thelbësor për të garantuar shërbime më cilësore dhe më të avancuara për pacientët.
Ajo nënvizoi se që nga viti 2022 është ngritur Regjistri i Sëmundjeve të Rralla, i cili po konsolidohet si bazë për një regjistër kombëtar funksional. Gjithashtu, në vitin 2021 u krijua Laboratori i Citogjenetikës Molekulare, ndërsa më pas u vu në funksionim Laboratori i Biologjisë Molekulare, ku realizohen diagnoza molekulare për patologji të shpeshta në popullatën shqiptare.
Një zhvillim strategjik, sipas ministres, është instalimi i teknologjisë Next Generation Sequencing, e cila do të përdoret për herë të parë në vend për përcaktimin e terapive intensive dhe target në hemopatite malinje dhe tumoret pediatrike të rralla. Qëllimi është që këto teste të ofrohen në Shqipëri me standarde ndërkombëtare, duke shmangur nevojën e pacientëve për trajtim jashtë vendit.
“Sëmundjet e rralla kërkojnë një qasje të integruar dhe multidisiplinare. Bashkëpunimi mes specialistësh, integrimi në rrjete europiane dhe partneritetet ndërkombëtare janë çelësi për të garantuar barazi në akses dhe standarde të larta shërbimi,” u shpreh Sala. Ajo theksoi se çdo hap përpara në diagnostikim dhe trajtim përkthehet në më shumë dinjitet, cilësi jete dhe shpresë për familjet që përballen me një sëmundje të rrallë, duke e cilësuar konferencën si një dëshmi të angazhimit për ndërtimin e një sistemi shëndetësor më modern dhe të orientuar drejt rezultateve konkrete.
