Kryeministri Edi Rama, nga Praga, ku mori pjesë në forumin GLOBSEC 2024, foli edhe për marrëveshjen me Italinë për emigrantët.
Rama tha se Shqipëria synon të jetë e dobishme për veten dhe për miqtë e saj.
Ai shtoi se Europa duhet të funksionojë si një trup i vetëm kur vjen puna në përballimin e sfidave të emigracionit.
“Nuk ka shumë në BE që e kundërshtojnë. BE që përfaqësohet nga Ursula von der Leyen nuk thotë se marrëveshja është e gabuar. Ka nga ana progresiste e Evropës që e konsideron këtë si ide të keqe. Mua më takon të jem i dobishëm për miqtë dhe për Shqipërinë, që ajo të jetë e dobishme për miqtë”, tha Rama.
Kryeministri theksoi se, “nëse miqtë kërkojnë diçka duhet të jesh pranë tyre, jo doemos duhet të biesh dakord 100 %”.
“Ne kemi shkuar në luftëra së bashku, ne erdhëm me ju dhe nuk e vumë në dyshim. Thënë kjo, marrëveshja në fjalë është për një temë që është kaq e madhe, kaq e rëndësishme, kaq përcaktuese për Europën dhe mënyrën se si ajo duhet të shohë veten dhe të ardhmen e saj. Po flas për emigracionin dhe ta transformosh atë në një zënkë mes të majtës dhe të djathtës, në një konflikt brenda Europës, tregon se ndërkohë që ky është një problem i të gjithë Europës. Europa nuk është gati të veprojë si një e vetme dhe në vend që të trajtojmë problemin, është më e lehtë ta ndërtojmë jetën e përditshme bazuar në politika partiake që nuk na çojën askund”, tha Rama.
