Pandemia e koronavirusit ka rezultuar me rreth 299,000 vdekje më shumë në Shtetet e Bashkuara, që nga fundi i janarit.
Sipas një studimi të Qendrave për Kontrollin dhe Parandalimin e Sëmundjeve, dy të tretat e vdekjeve shtesë i atribuohen koronavirusit dhe pjesa tjetër shkaqeve të tjera.
Hulumtuesit i krahasuan normat e vdekjeve me periudhën 2015-2019 dhe zbuluan se nga 26 janari i këtij viti deri më 3 tetor, kanë vdekur 299,028 njerëz më shumë seç pritej.
Qendrat për Kontrollin dhe Parandalimin e Sëmundjeve në SHBA vlerësojnë se numri real i viktimave nga koronavirusi mund të jetë më i lartë, për shkak të mungesës së testimit dhe diagnostikimit.
Raporti thekson se ka pasur edhe viktima indirekte nga koronavirusi “për shkak të mungesës së qasjes në kujdesin shëndetësor”.
Po sipas raportit, vdekjet shtesë në mesin e hispanikëve janë rritur për 53.6 për qind, në mesin e afrikano-amerikanëve për 32.9 për qind, në mesin e aziatikëve për 36.6 për qind dhe në mesin e të bardhëve për 11.9 për qind.
SHBA-ja është vendi më i prekur në botë nga koronavirusi, me mbi 8.2 milionë njerëz të infektuar.
