Komisionerja e BE-së për Çështjet e Brendshme, Ylva Johansson ka ngritur shqetësime për një rregull të ri të Hungarisë – lidhur me vizat për punonjësit e huaj nga Rusia dhe Bjellorusia.
Duhet të sigurohet që shtetasit rusë që mund të paraqesin rrezik për spiunazh apo kërcënime të tjera të sigurisë të përballen me nivelin më të lartë të kontrollit”, shkroi Johansson në një letër drejtuar ministrit të Brendshëm hungarez, Sandor Pinter, të cilën ajo e ndau në platformën X.
Johansson tha se kjo skemë kërcënon të minojë mbrojtjen e zonës së udhëtimit Shengen pa pasaporta – dhe i bëri thirrje qeverisë hungareze të jepte shpjegime të mëtejshme.
Hungaria ka zbatuar më parë një regjim të veçantë të vizave për punonjësit e huaj nga Ukraina dhe Serbia. Budapesti i zgjeroi rregullat në korrik në tetë vende, duke përfshirë qytetarë nga Rusia dhe Bjellorusia.
Sipas rregulloreve të vizave, punonjësit e huaj mund të qëndrojnë për dy vjet dhe më pas t’u zgjatet qëndrimi për tre vjet në të njëjtën kohë – për sa herë që dëshirojnë.
Punonjësit e huaj mund të punojnë gjithashtu në çdo profesion. Megjithatë, për të përfituar nga rregullorja, ata duhet të dëshmojnë se kanë një punë, strehim dhe sigurim shëndetësor në Hungari.
Rregulloret kanë shkaktuar zemërim në BE ditët e fundit. Kryetari i Partisë Popullore Evropiane (EPP) Manfred Weber paralajmëroi presidentin e Këshillit Evropian Charles Michel në një letër se masa e liberalizimit të vizave mund të përbëjë një “rrezik serioz” për sigurinë e BE-së.
Qeveria e kryeministrit hungarez, Viktor Orban shihet si e afërt me Rusinë – nga shtetet e tjera anëtare të BE-së.
Gjithashtu, Orban u kritikua ashpër nga vendet e tjera të BE-së për vizitat e fundit në Kiev, Moskë dhe Pekin – të cilat ai i justifikoi si pjesë e një “mision paqeje” të vetëshpallur për t’i dhënë fund luftës në Ukrainë.
