Këto janë pamjet nga ambienti i brendshëm i zyrës së pritjes në komisariatin numër 3, një ditë pasi protestuesit i vunë flakën gjatë protestës.
Vihen re dosjet e djegura dhe i gjithë vendi i shkatërruar.
Ndërkohë, drejtori i Përgjithshëm i Policisë së Shtetit, Skënder Hita, tha mbrëmë se si pasojë e këtij sulmi, mbetën të plagosur 10 punonjës të Policisë së Shtetit, të cilët ishin në krye të detyrë, në shërbim të ruajtjes dhe sigurisë së komisariatit.
“Sulmi krijoi një rrezik serioz jo vetëm për jetën dhe shëndetin e punonjësve të Policisë, por edhe për personat e shoqëruar që ndodheshin brenda ambienteve të Komisariatit.
Dua të jem shumë i qartë për të gjithë se sulmi ndaj një komisariati policie nuk është protestë.
Goditja e punonjësve të Policisë me bomba molotov dhe mjete të tjera të rrezikshme është dhunë e rëndë, e cila dënohet nga ligji dhe nuk mund të justifikohet në asnjë rrethanë”, deklaroi Hita mbrëmjen e djeshme.
