Autoritetet në Tajlandë planifikojnë të dërgojnë helikopterë të mërkurën e 26 nëntorit, për të evakuuar pacientët në gjendje kritike nga një spital në jug të vendit, i izoluar nga disa prej përmbytjeve më të rënda të rajonit në vite, ndërsa numri i viktimave u rrit në 33.
Përmbytjet kanë përfshirë nëntë provinca tajlandeze dhe tetë shtete në Malajzinë fqinje për vitin e dytë radhazi, duke detyruar të dy vendet të evakuojnë gati 45 mijë persona.
Në Indonezi, vlerësohet se 8 deri në 13 persona kanë humbur jetën pas përmbytjeve dhe rrëshqitjeve të dheut këtë javë, ndërsa një viktimë është raportuar në Malajzi.
Në qytetin më të goditur të Tajlandës, Hat Yai, një zyrtar i shëndetësisë publike tha se helikopterët do të dërgojnë ushqime dhe do të transportojnë pacientët, pasi kati i parë i spitalit kryesor qeveritar, ku trajtohen 600 persona (rreth 50 prej tyre në kujdes intensiv) është përmbytur.
“Gjatë ditës së sotme, të gjithë pacientët në kujdes intensiv do të transportohen jashtë Spitalit Hat Yai,” tha për Reuters zyrtari i ministrisë, Somrerk Chungsaman.
Rreth 20 helikopterë dhe 200 varka të angazhuara në operacionin e shpëtimit në Hat Yai kanë hasur vështirësi për të arritur tek njerëzit e bllokuar, tha zëdhënësi i qeverisë, Siripong Angkasakulkiat.
Pacientët, të afërmit dhe stafi mjekësor në spital janë rreth 2 mijë persona dhe varkat pritet të mund të sjellin ushqime ndërsa uji tërhiqet, shtoi Somrerk Chungsaman.
Vetëm në një ditë javën e kaluar, Hat Yai mori 335 mm (13 inç) shi, sasia më e lartë në 300 vitet e fundit.
Helikopterët ushtarakë po transportonin gjithashtu gjeneratorë drejt spitalit, tha Marina Tajlandeze, duke postuar fotografi në rrjetet sociale të pajisjeve që po vendoseshin në çati nën qiellin gri të errët.
Përmbytjet në nëntë provinca tajlandeze, përfshirë Songkhla ku ndodhet Hat Yai, kanë prekur mbi 980 mijë banesa dhe më shumë se 2.7 milionë njerëz.
Zyrtarët e motit në Tajlandë parashikuan shtrëngata të shpërndara dhe reshje të dendura të mërkurën në disa provinca jugore.
Autokolona avionësh dhe kamionësh po transportonin varka me fund të sheshtë dhe gomone drejt Hat Yai, së bashku me furnizime mjekësore dhe personel, tha ushtria tajlandeze, e cila mori drejtimin e operacioneve të ndihmës të martën.
Aeroplanmbajtësja e vetme e Tajlandës, Chakri Naruebet, u nis nga porti i saj të martën për të ofruar mbështetje ajrore, ndihmë mjekësore dhe ushqime në operacionet e ndihmës.
Shpëtimtarët nxorën familje të bllokuara, përfshirë fëmijë dhe të moshuar, nga shtëpitë e përmbytura nga ujërat e turbullt. Shumë nga të bllokuarit iu drejtuan faqeve të internetit dhe rrjeteve sociale për të kërkuar ndihmë.
