Kryeministri i Ukrainës, Oleksiy Honcharuk njoftoi se ka paraqitur dorëheqjen e tij, një ditë pasi ishte inçizuar duke thënë se presidenti i vendit nuk di asgjë për ekonominë.
Në një postim sot në rrjetin social, Honcharuk tha se ai i ka paraqitur dorëheqjen presidentit ukrainas, Volodymyr Zelenskiy.
“Unë e mora këtë post për të zbatuar programin e presidentit. Ai është një shembull i transparencës dhe vendosmërisë për mua”, tha ai.
“Megjithatë, për të shmangur çdo dyshim në lidhje me respektin dhe besimin tim për presidentin, unë shkrova letrën e dorëheqjes dhe ia dërgova presidentit për ta paraqitur në Parlament”, thuhet në dorëheqjen e Honcharuk.
Në fillim të kësaj jave, doli një audio-regjistrim, në të cilin Honcharuk dëgjohet duke bërë komente ofenduese mbi njohuritë e presidentit Zelenskiy për ekonominë.
